KONTRIBUO PER TRAGJEDINE E GERDECIT

I dashur Mik,

Tragjedia e ditës së shtunë në fshatin Gërdec ka shkaktuar deri më tani shume të vdekur, një numër të papërcaktuar të humburish dhe me qindra të plagosur. Me qindra shtëpi janë rrënuar krejtësisht, njerëzit kanë humbur jo vetëm të afërmit, por edhe çatitë mbi kokat e tyre. Dëmit të tmerrshëm njerezor i është shtuar edhe dëmi i hidhur material.

Qeveria Shqiptare është përpjekur të sillet me këtë tragjedi ashtu siç do të sillej me një katastrofë të cfaredo natyrore, paçka se është një tragjedi e shkaktuar nga një papërgjegjshmeri ekstreme që lejoi vendosjen e një fabrike të çmontimit të municioneve luftarake në një qendër të banuar, në mes të një zone me popullsi të dendur e pranë rrugës kryesore në vend. Banorët e varfër të fshatit Gërdec u përdorën paturpësisht për të kryer një punë që duhej të ndërmerrej vetëm nga specialistë të fushës të cilët mund të kishin siguruar kushtet e nevojshme. Në vend të këtyre specialistëve, dëshira për të përfituar sa më shumë, sa më shpejt bëri që të punësoheshin deri edhe fëmijë të cilët shoqëronin prindërit e tyre në punë me shpresën për t’i shtuar sado pak lek më tepër të ardhurave të pakta të familjes.

Përballë papërgjegjshmërisë dhe paaftësisë të qeverisë ndodhen në këto çaste me qindra njerëz. Familjarët e viktimave të tragjedisë, të të vrarëve, të të zhdukurve, të të plagosurve kanë nevojë për ndihmën e të gjithë neve në përpjekjen e tyre për të rindërtuar përsëri një jetë normale. Paçka se asgjë s’mund ta zëvendësojë humbjen e të dashurve të tyre, ose të zhdukë plagët nga trupat e qindra të plagosurve ndihma jonë ekonomike mund të zbusë pakëz dhimbjen dhe për këtë arsye Lëvizja Mjaft! ju bën thirrje që të kontribuoni në numrin e llogarisë më poshtë të hapur pranë Bankës Amerikane të Shqipërisë.

ABA- American Bank of Albania
Numëri i llogarisë (në Lek): 1040831807
Adresa e Bankës: Rr. Ismail Qemali, Ndërtesa e Bankës Amerikane -NG NR 27 POBOX 8319
Kodi SWIFT / ABA nr:  USALALTR

Ndihmat e mbledhura deri në datën 15 prill do të shpërndahen tek banorët e dëmtuar. Çdo kontribues në llogarinë e mësipermë do të ketë të drejtën e kontrollit të drejtëpërdrejtë të kësaj llogarie nëpërmjet faqes në rrjet të Bankës Amerikane të Shqipërisë në adresën https://www.abaflex.com