“MJAFT!”, letra ngushëllimi për Ibrahim Rugovën – Korrieri

23 Janar 2006

Nga Lëvizja Mjaft!

Me iniciativën e Lëvizjes Mjaft!, qindra qytetarë të rastit kanë shkruar mesazhet e tyre të ngushëllimit për Presidentin Ibrahim Rugova. Brenda pak orësh, mbi 200 letra të mbushura me ndjesitë dhe vlerësimet e tyre në bulevardin “Dëshmorët e Kombit”.

Më tepër se dyqind mesazhe janë shkruar dje përballë kryeministrisë, në një kohë mjaft të shkurtër, nga kalimtarë të rastit. Dhe kjo vazhdon deri të mërkurën. Të gjitha letrat dhe mesazhet do të shkojnë në Presidencën e Kosovës. Një iniciativë e organizuar nga Lëvizja Mjaft! për t’i shprehur ngushëllimin familjes, presidencës, dhe të gjithë popullit të Kosovës “për vdekjen e një lideri të madh si Ibrahim Rugova nga vëllezërit e tyre, shqiptarët e Shqipërisë”, siç sqaruan anëtarë të kësaj Lëvizjeje. Çaste hidhërimi dhe krenarie u përjetuan dyfish nga qytetarët e Tiranës ndërsa po shkruanin mesazhet e tyre personale. “Hidhërimi për humbjen e një lideri të madh, simboli i luftës paqësore për pavarësinë e Kosovës, dhe krenaria për një figurë kaq të lartë, jo vetëm për popullin e Kosovës, por për të gjithë shqiptarët, i cili i ka mbrojtur idealet e tij me çdo kusht dhe pa asnjë kompromis”, mund të përmbledhësh nga letrat e kalimtarëve në bulevardin “Dëshmorët e Kombit”. Ndjenjat dhe përjetimet e kalimtarëve të rastit, për Ibrahim Rugovën janë shprehur me shumë fjalë. Në mesazhin e tij, Jeton Xhaferi shkruan: “Ky njeri i madh për pavarësinë e Kosovës ndërtoi një ‘kështjellë’ e cila nuk do të shplurëzohet nga ‘stuhitë’ e kohës”; ndërsa Iliaz Nako shkruan: “Ngushëllimet e mia për familjen, presidencën, qeverinë dhe mbarë popullin shqiptar për humbjen e burrit të madh të paqes dhe prosperitetit të Kosovës. I përjetshëm kujtimi i Ibrahim Rugovës”. Një pjesë e kalimtarëve që kanë hedhur në letër ngushëllimet dhe vlerësimet e tyre, me këtë pjesëmarrje të gjerë, falë iniciativës së Mjaft! kanë treguar jo vetëm ndjeshmërinë ndaj Ibrahim Rugovës, por edhe vëlla-dashurinë, duke iu gjendur pranë popullit të Kosovës duke u bashkuar me dhimbjen për humbjen e udhëheqësit Rugova.