Mesazhe nga studentët për presidentin Rugova - Njoftim për shtyp nga Lëvizja MJAFT

Për shpërndarje të menjëhershme

Tiranë, 24/01/2006

Drejtues të Lëvizjes MJAFT dhe një grup studentësh kosovarë që studiojnë në Shqipëri i dorëzuan sot (e martë) Presidentit Alfred Moisiu, të gjitha mesazhet përkujtimore që qytetarët e Tiranës kanë shkruar gjatë dy ditëve të fundit, në nderim të emrit dhe veprës së Presidentit Ibrahim Rugova.

Mesazhet e shkruara nga qytetarët e Tiranës, një iniciativë kjo e lëvizjes MJAFT dhe e studentëve kosovare, iu dorëzuan Presidentit Moisiu në një nga mjediset e Akademisë së Shkencave në kryeqytet, ku ai zhvilloi homazhe për nder të Presidentit Rugova.

Të vendosura të gjitha në një dosje përkujtimore, këto mesazhe do të shkojnë në Kosovë bashkë me delegacionin e Shqipërisë, të enjten, në ditën kur Presidenti Rugova do të përcillet për në banesën e fundit.

Pas dorëzimit të mesazheve përfaqësuesit e Lëvizjes MJAFT dhe studentët kosovarë zhvilluan homazhet në nderim të Presidentit Ibrahim Rugova, i cili u nda nga jeta në moshën 61 vjeçare, në një moment shumë të rëndësishëm për Kosovën, vetëm pak ditë para fillimit të negociatave për statusin përfundimtar.

Zyra e Shtypit e Lëvizjes MJAFT